Детский фольклор

Балаларның телен, зиһенен ачуда, күңелләрен күтәрүдә алар өчен беренче дәрәҗәдә кирәкле булган үз авыз иҗатлары бар. Ул – балалар фольклоры. Бу фольклор аларның үз зәвыкларына корылган. Шунлыктан аларны бик тиз отып алалар, телдән сөйли, җырлый яки әйтеп бииләр. Шулай ук балаларның җитезлек, уяулык, тапкырлык сәләтен үстерә торган җырлы-сүзле төрле уеннар да бар. Балалар фольклорының үзенчәлекләре һәм тәрбияви роле никадәр зур икәнлеге турында бу китапның ахырында махсус аңлатма-анализлар да бирелде. Балалар фольклорын үзенә бер аерым жанр – авыз иҗаты итеп карап, аны махсус җыю, системага салу эше бездә Н. Исәнбәт тарафыннан башланып, беренче җыентыгы «Балалар фольклоры» исемендә 1941 елда Татарстан китап нәшрияты тарафыннан бастырып чыгарылган иде. Әлеге китапның беренче басмасы 1984 елда нәшер ителде. Икенче басмадагы кайбер сүзләр бүгенге әдәби тел нормаларына туры китереп бирелә.